НҰР-СҰЛТАН. ҚазАқпарат — 2019 жылы «Болашақ» корпоративтi қоры мен «Nur Otan» партиясы Қазақстан бойынша 20 инклюзивтi сынып ашады, деп хабарлайды ҚазАқпарат тiлшiсi.

Бұл бастама «Nur Otan» партиясының «Кедергiсiз келешек» жобасының бiрiншi бағытын жүзеге асыру аясында ұсынылған. Қазiргi уақытта елiмiздiң барлық өңiрлерiнде инклюзивтi бiлiм беру үлгiсiмен қамту жұмыстары жүруде. Әзiрге «Болашақ» корпоративтi қоры Қазақстанның 9 қаласында инклюзивтi сыныптар ашқан. Осылайша, аутизмi мен өзге де менталды ауытқушылықтары бар 248 бала өз қатарластарымен бiрге мектепке бару мүмкiндiгiн алды. Дүниежүзiлiк денсаулық сақтау ұйымының деректерiне сәйкес, әлем елдерi секiлдi Қазақстанда да аутизммен ауыратын балалар саны көбейiп, 35 мыңнан асты. Яғни, әрбiр 50 баланың бiреуi аутизмге шалдыққан. «Баланың мектепке бара алуы өте маңызды. Алдағы уақытқа қойған мақсатымыз — Қазақстанның әрбiр қаласында инклюзия кабинеттерiн ашу. Қазiргi уақытта 9 қалада осындай сыныптарымыз бар, жыл соңына дейiн тағы 20 кабинет ашуымыз керек», — дедi «Болашақ» корпоративтi қорының директоры Динар Шәйжүнiсова. Оның айтуынша, инклюзивтi кабинеттер арқылы Батыс Қазақстан, Шымкент және Қызылорда облыстарында аутизмi бар балалар алғаш рет мектеп табалдырығын аттаған. Айта кетейiк, 2 сәуiр — Бүкiләлемдiк аутизм мәселесi туралы ақпарат тарату күнi. Бұл күн 2008 жылы Катар мемлекетiнiң бастамасымен бекiтiлген. Бұл бастаманың мақсаты — жазылмайтын ауруға шалдыққан адамдардың қажеттiлiгiне назар аудару, олардың өмiр сапасын жақсарту.